Wat kan Braaidag ons leer oor produkposisionering?
In Suid-Afrika vier ons op 24 September ons land se unieke kulturele diversiteit. Braaidag is nou al so goed ingeburger dat sommige mense nie eens weet dis eintlik Erfenisdag nie. Die Braaidag-idee het in 2005 ontstaan, in erkenning van die tradisie wat alle (wel, die meeste) Suid-Afrikaners in gemeen het. Dit bevorder die idee dat verskeidenheid, eerder as iets wat konflik skep, ’n nasionale bate is. Dis die dag waarop ons ons Suid-Afrikaansheid kan geniet. Ongeag taal, streek of geloof, ons deel ’n erfenis van braai, shisa nyama of ukosa.
Maar hoekom was die Braaidag-idee so suksesvol? Die antwoord lê in die posisionering. Dit het Suid-Afrikaners, die verbruiker, se hartsnare geroer. Die sukses van Braaidag wys hoe doeltreffende posisionering tot sukses bydra.
’n Identiteit vir álle Suid-Afrikaners
Die man agter Nasionale Braaidag is Jan Braai (Jan Scannell). Sy idee was ’n bydrae tot nasiebou: Suid-Afrikaners het ’n gedeelde aspek van Suid-Afrikaanse kultuur herken en met ope arms verwelkom. Slim bemarking en posisionering het nie net Jan Braai se sukses versterk nie, maar ook vir die openbare vakansiedag ’n saambindende en positiewe beeld vir Suid-Afrikaners van alle kulture geskep.
Posisionering is ’n belangrike aspek in die ontwikkeling van ’n doeltreffende bemarkingstrategie – en ’n mens weet hoe dit smaak nadat die tjoppie op die kole was.
Posisionering
Posisionering gaan oor hoe iets aangebied word sodat dit vir die teikenverbruiker uitstaan en betekenis het. Dit is ook die ding wat jou diens van mededingers s’n onderskei en skep as’t ware ‘n eie lewe in die verbruiker se kop. Dis die rede waarom sommige mense Pepsi sal drink, maar talle ander mal oor Coke sal wees.
Posisionering verseker dat alle aktiwiteite rondom ’n handelsnaam dieselfde doelwit het. Die handelsnaam lei, rig, dra en fokus al die kontakpunte met die verbruiker. Nie net lig dit die lewensvatbaarheid van ’n produk of diens uit nie, maar dit kan ook lei tot ’n nuwe koers en ontdekking van nuwe geleenthede tydens die afbakening van ’n duidelike nismark.
Posisionering en strategie is ’n duidelike rigtingaanwyser vir die ontwikkeling van ’n handelsnaam, asook die toekomstige bemarkingsplanne. Dit is ’n spesialisveld wat verkieslik deur kundiges gedoen moet word vir die beste resultate.
Posisionering blaas die vuur aan
In Positioning: The battle for your mind, beklemtoon Al Ries en Jack Trout die idee dat ’n mens ’n deurslaggewende insig nodig het vir posisionering – iets wat gebruik kan word om die mededingende voordeel te kry, iets wat die spesifieke manier identifiseer waarop die handelsnaam die probleem oplos of ’n geleentheid vir die verbruiker skep. So ’n insig moet langdurig wees en vorm die basis vir die posisionering.
In Jan Scannell se geval was baie van die dinkwerk reeds gedoen, maar hy het die geweldige potensiaal van “braai” gesien en die geleentheid aangegryp. Braai was iets wat Suid-Afrikaners reeds as ’n waardevolle entiteit gesien het en deur Nasionale Braaidag te posisioneer as ’n manier om die nasie saam te bind, illustreer dit hoe ’n deurslaggewende insig in sosiale gedrag en kulturele diversiteit tot ’n eenvoudige, maar kragtige konsep en handelsbeeld kan lei.
Die naam
Die handelsnaam is die eerste kontakpunt tussen die boodskap en die verbruiker. Of ’n naam uitsonderlik is of nie, bepaal nie altyd die doeltreffendheid daarvan nie – dit gaan oor hoe gepas die naam is. Aanvanklik het Nasionale Braaidag dalk verspot geklink, maar soos die naam die posisioneringsproses begin (en die afgelope 15 jaar gedra) het en verbruikers die nut daarvan laat insien het, is die voordeel van Braaidag duidelik bevestig.
Jan Braai se veldtog was so suksesvol dat die Nobelvredepryswenner emeritus-aartsbiskop Desmond Tutu ingestem het om ’n beskermheer van Nasionale Braaidag te wees. In 2007 het die inisiatief die goedkeuring van die Suid-Afrikaanse Nasionale Erfenisraad ontvang. Jan Braai het ook ’n openbare persoonlikheid geword en het sy eie resepteboek, Vuurwarm, gepubliseer en was die gasheer van die televisieprogram Jan Braai vir Erfenis. Intussen het die Braaidag-konsep ook verder gegroei en spog al met ’n Braaidag-app en selfs ’n Braaidag-lied.
Lemonade Hub se dienste is sakpas en volgens behoefte. Laat ons jou help met doeltreffende strategiese beplanning en beeldbemarking. Kontak ons vir ’n konsultasie – ons word graag jou dinkvennoot!
